సర్వైకల్ క్యాన్సర్ నివారణకు HPV వ్యాక్సినేషన్ డ్రైవ్ ప్రారంభం..
DNB News - ఆంధ్రప్రదేశ్ / : ప్రాణాంతకమైన సర్వైకల్ క్యాన్సర్‌ను నివారించడమే లక్ష్యంగా HPV (హ్యూమన్ పాపిల్లోమావైరస్) వ్యాక్సినేషన్ డ్రైవ్ చేపడుతున్నట్లు జిల్లా కలెక్టర్ డా. ఏ. సిరి తెలిపారు. శుక్రవారం కలెక్టరేట్ కాన్ఫరెన్స్ హాల్‌లో HPV (హ్యూమన్ పాపిల్లోమావైరస్) వ్యాక్సిన్ క్యాంపెయిన్ పోస్టర్‌ను కలెక్టర్ ఆవిష్కరించారు. ఈ సందర్భంగా మాట్లాడుతూ జిల్లాలో సర్వైకల్ క్యాన్సర్‌ను నివారించేందుకు ఈ వ్యాక్సినేషన్ డ్రైవ్ నిర్వహిస్తున్నట్లు తెలిపారు. 14 ఏళ్లు నిండి 15వ ఏట అడుగుపెట్టే (14వ పుట్టినరోజు జరుపుకొని 15వ పుట్టినరోజుకు ముందున్న) బాలికలందరికీ ఈ వ్యాక్సిన్ వేయనున్నట్లు చెప్పారు. ‘గార్డాసిల్-4’ (Gardasil-4) వ్యాక్సిన్‌ను 0.5 మిల్లీలీటర్ల మోతాదులో ఎడమ చేతికి వేస్తారని తెలిపారు. వయస్సు నిర్ధారణ కోసం ఆధార్ కార్డు మరియు తల్లిదండ్రుల సమ్మతి పత్రం (Consent Letter) తప్పనిసరిగా సమర్పించాల్సి ఉంటుందని పేర్కొన్నారు. టీకా వేయించుకునే వారు ‘U-Win’ పోర్టల్ లేదా స్పాట్ రిజిస్ట్రేషన్ ద్వారా తమ పేర్లను నమోదు చేసుకోవచ్చన్నారు. టీకా వేయించుకోవడానికి వచ్చే వారు తప్పనిసరిగా ఆహారం తీసుకొని రావాలని సూచించారు. టీకా వేసుకున్న తర్వాత 30 నిమిషాల పాటు ఆరోగ్య కేంద్రంలోనే వైద్యుల పర్యవేక్షణలో ఉండాల్సి ఉంటుందని తెలిపారు. జిల్లాలోని అన్ని ప్రాథమిక ఆరోగ్య కేంద్రాల్లో (PHC) ఈ వ్యాక్సినేషన్ అందుబాటులో ఉంటుందని చెప్పారు. జిల్లాలో మొత్తం 19,704 మంది బాలికలను లక్ష్యంగా పెట్టుకొని ఈ క్యాంపెయిన్ సుమారు మూడు నెలల పాటు కొనసాగుతుందని వివరించారు. ఈ కార్యక్రమంలో డీఎంహెచ్వో డా. భాస్కర్ రాజు, జీజీహెచ్ సూపరింటెండెంట్ డా. వెంకటేశ్వర్లు, కర్నూలు మెడికల్ కళాశాల ప్రిన్సిపల్ డా. చిట్టి నరసమ్మ, డీసీహెచ్ఎస్ డా. జాఫ్రుల్లా తదితరులు పాల్గొన్నారు.
Admin
DNB News
మరిన్ని వార్తలు
Developed By :
