ఆంధ్రప్రదేశ్ లిక్కర్ స్కామ్ కేసులో భారీ చర్యలు
DNB News - ఆంధ్రప్రదేశ్ / : ఆంధ్రప్రదేశ్ లిక్కర్ స్కామ్ కేసులో భారీ చర్యలు చేపట్టిన ఎన్ఫోర్స్మెంట్ డైరెక్టరేట్ (ఈడీ). లిక్కర్ స్కామ్కు సంబంధించి రూ.441.63 కోట్ల విలువైన స్థిర, చర ఆస్తులను ఈడీ అటాచ్ చేసింది. ఈ ఆస్తులు కేసిరెడ్డి రాజశేఖర రెడ్డి, ఆయన కుటుంబ సభ్యులు, అనుబంధ సంస్థలు, బూనేటి చాణక్య మరియు అతని అనుబంధ సంస్థలు, దొంతిరెడ్డి వాసుదేవ రెడ్డి కుటుంబ సభ్యులు మరియు ఇతరులకు చెందినవిగా ఈడీ గుర్తించింది. బ్యాంకు బ్యాలెన్సులు, ఫిక్స్డ్ డిపాజిట్లు, భూములు మరియు ఇతర స్థిరాస్తులు ఈ అటాచ్ చేసిన ఆస్తుల్లో ఉన్నాయి. ఆంధ్రప్రదేశ్ ప్రభుత్వానికి సుమారు రూ.4 వేల కోట్ల నష్టం కలిగిందని రాష్ట్ర ప్రభుత్వ ప్రధాన కార్యదర్శి ఇచ్చిన ఫిర్యాదుతో ఏపీ సీఐడీ నమోదు చేసిన కేసు ఆధారంగా ఈడీ దర్యాప్తు ప్రారంభించింది. దర్యాప్తులో కీలక విషయాలు బయటపడ్డాయి. 2019కి ముందు రాష్ట్రంలో లిక్కర్ వ్యాపారం పూర్తిగా డిజిటల్, పారదర్శక సాఫ్ట్వేర్ వ్యవస్థ ద్వారా నడిచేదని ఈడీ తెలిపింది. అయితే 2019 ఎన్నికల తర్వాత ప్రభుత్వ రిటైల్ ఔట్లెట్ల ద్వారా లిక్కర్ అమ్మకాలను ప్రభుత్వం ఏకపక్షంగా నిర్వహించిందని వెల్లడించింది. ఈ సమయంలో ఆటోమేటెడ్ వ్యవస్థను ఉద్దేశపూర్వకంగా నిలిపివేసి, మాన్యువల్ విధానం ప్రవేశపెట్టారని ఈడీ తెలిపింది. దీని ద్వారా సరఫరా ఆర్డర్లు ఇవ్వడంలో అధికారులకు పూర్తి స్వేచ్ఛ లభించిందని వెల్లడించింది. కొన్ని కంపెనీల బ్రాండ్లకు అన్యాయం చేసి, “ఫేవర్ చేసిన” బ్రాండ్లకు మాత్రమే ఎక్కువ సరఫరా అవకాశాలు ఇచ్చి భారీ కిక్బ్యాక్లు వసూలు చేసినట్లు దర్యాప్తులో తేలిందని తెలిపింది. ప్రతి కేసుపై 15 నుంచి 20 శాతం వరకు అక్రమ కమీషన్ వసూలు చేసినట్లు ఈడీ గుర్తించింది. ఈ కిక్బ్యాక్లు సిగ్నల్ వంటి ఎన్క్రిప్టెడ్ యాప్ల ద్వారా సమన్వయం చేసుకున్నట్లు తెలిపింది. ఈ మొత్తం లిక్కర్ సిండికేట్ ద్వారా రాష్ట్ర ఖజానాకు సుమారు రూ.3500 కోట్ల నష్టం కలిగిందని ఈడీ వెల్లడించింది. ఈ డబ్బును రియల్ ఎస్టేట్, ఇతర వ్యాపారాల ద్వారా మనీ లాండరింగ్ చేసినట్లు దర్యాప్తులో బయటపడింది.
Admin
DNB News
మరిన్ని వార్తలు
Developed By :
