కార్పొరేట్ అనుకూల రాష్ట్ర బడ్జెట్కు వ్యతిరేకంగా రైతు సంఘాల నిరసన – ఆదోని సబ్ కలెక్టర్ కార్యాలయంలో మెమోరాండం సమర్పణ
DNB News - ఆంధ్రప్రదేశ్ / : రాష్ట్ర ప్రభుత్వం ప్రవేశపెట్టిన 2026-27 బడ్జెట్ రైతులకు, ముఖ్యంగా కౌలు రైతులకు ఏమాత్రం ప్రయోజనం కలిగించదని, ఇది పూర్తిగా కార్పొరేట్ కంపెనీలకు అనుకూలంగా ఉందని ఆరోపిస్తూ ఆంధ్రప్రదేశ్ రైతు సంఘం, కౌలు రైతు సంఘం మరియు భారత కమ్యూనిస్టు పార్టీ (సిపిఐ) ఆధ్వర్యంలో సోమవారం ఉదయం 11 గంటలకు ఆదోని సబ్ కలెక్టర్ కార్యాలయంలో సూపరింటెండెంట్ వసుంధర కి నిరసన మెమోరాండం సమర్పించారు. ఈ సందర్భంగా నాయకులు మాట్లాడుతూ, రాష్ట్ర ఆర్థిక శాఖ మంత్రి పయ్యావుల కేశవ్ ఫిబ్రవరి 14న అసెంబ్లీలో ప్రవేశపెట్టిన రూ.3.33 లక్షల కోట్ల బడ్జెట్లో వ్యవసాయ రంగానికి కేవలం 4.31% మాత్రమే కేటాయించడం తీవ్ర నిరాశ కలిగించిందన్నారు. గ్రామీణ ఆర్థిక వ్యవస్థకు వెన్నెముకైన రైతాంగాన్ని విస్మరించే విధంగా ఈ బడ్జెట్ ఉందని విమర్శించారు. బడ్జెట్లోని ప్రధాన లోపాలు: నిధుల కోత: ‘అన్నదాత సుఖీభవ’ పథకానికి గతంలో రూ.9,400 కోట్లు ఉండగా, ప్రస్తుతం రూ.6,660 కోట్లకు తగ్గించారు. కౌలు రైతుల విస్మరణ: రాష్ట్రంలో మెజార్టీగా సాగు చేస్తున్న కౌలు రైతుల ప్రస్తావనే లేకపోవడం గమనార్హం. నామమాత్రపు కేటాయింపులు: వడ్డీ రాయితీకి అవసరమైన రూ.2,000 కోట్లకు బదులుగా రూ.250 కోట్లు మాత్రమే. ధరల స్థిరీకరణ నిధికి అవసరమైన రూ.3,000 కోట్లకు బదులుగా రూ.500 కోట్లు మాత్రమే. రక్షణ కవచం లేమి: ఉచిత పంటల బీమా ఎత్తివేయడం, ప్రకృతి విపత్తుల సహాయ నిధికి కేటాయింపులు లేకపోవడం వల్ల రైతులు అసురక్షిత పరిస్థితిలో ఉన్నారు. అనుబంధ రంగాల నిర్లక్ష్యం: పశుసంవర్ధక, మత్స్య, ఆక్వాకల్చర్ రంగాలకు తగిన ప్రాధాన్యం ఇవ్వలేదు. ప్రధాన డిమాండ్లు: రాష్ట్ర బడ్జెట్లో వ్యవసాయం మరియు అనుబంధ రంగాలకు కనీసం 10% నిధులు కేటాయించాలి. గత, ప్రస్తుత సంవత్సరాల బకాయిల కింద రూ.27,500 కోట్లు వెంటనే విడుదల చేయాలి. భూమిలేని కౌలు రైతులకు రావలసిన రూ.3,500 కోట్ల బకాయిలను తక్షణమే వారి ఖాతాల్లో జమ చేయాలి. ఎన్నికల వాగ్దానం మేరకు నూతన కౌలు రైతుల చట్టం తీసుకురావాలి. ధరల స్థిరీకరణకు రూ.3,000 కోట్లు, వడ్డీ రాయితీకి రూ.2,000 కోట్లు, ఉచిత పంట బీమాకు రూ.2,000 కోట్లు కేటాయించాలి. మైనర్ ఇరిగేషన్ పనులకు కనీసం రూ.5,000 కోట్లు కేటాయించి, పెండింగ్ సాగునీటి ప్రాజెక్టులను పూర్తి చేయాలి. నిర్వాసితుల సమస్యలు పరిష్కరించేందుకు నిధులు కేటాయించాలి. ఆత్మహత్యలు చేసుకున్న రైతు కుటుంబాలకు తక్షణ ఎక్స్గ్రేషియా చెల్లించాలి. కేంద్ర బడ్జెట్లో వ్యవసాయానికి నిధులు పెంచేలా రాష్ట్ర ప్రభుత్వం ఒత్తిడి తేవాలి. రైతాంగం ఆర్థికంగా కుంగిపోకుండా ఉండాలంటే ప్రభుత్వం ఈ అంశాలను గుణపరిశీలన చేసి బడ్జెట్లో తక్షణ మార్పులు చేయాలని నాయకులు విజ్ఞప్తి చేశారు. ఈ కార్యక్రమంలో కె. లక్ష్మీ రెడ్డి (రైతు సంఘం అధ్యక్షులు), కల్లుబావి రాజు (సిపిఐ మండల కార్యదర్శి), కొత్తూరు గంగన్న (BKMU అధ్యక్షులు), శివరాములు (ప్రజానాట్యమండలి నాయకులు), ఓబి నాగరాజ్ (ఏఐటియుసి జిల్లా సహాయ కార్యదర్శి), వై.యు. భీమేష్ (ఏఐటియుసి ఆదోని పట్టణ అధ్యక్షులు) తదితరులు పాల్గొన్నారు.
Admin
DNB News
మరిన్ని వార్తలు
Developed By :
