బాలికపై లైంగిక దాడి ఘటన ఆలస్యంగా వెలుగులోకి వచ్చింది
DNB News - తెలంగాణ / : ఆంధ్రప్రదేశ్‌లోని అనకాపల్లి జిల్లాలో బాలికపై లైంగిక దాడి ఘటన ఆలస్యంగా వెలుగులోకి వచ్చింది. పాయకరావుపేటలో చోటుచేసుకున్న ఈ ఘటనపై బాధితురాలు నాలుగు రోజుల క్రితమే పోలీసులకు ఫిర్యాదు చేసినట్లు సమాచారం. పోలీసులు గుట్టుచప్పుడు కాకుండా కేసు నమోదు చేసి నిందితుడిని రిమాండ్‌కు తరలించినట్లు తెలుస్తోంది. ఈ నియోజకవర్గం రాష్ట్ర హోంమంత్రి వంగలపూడి అనిత ప్రాతినిధ్యం వహిస్తున్న ప్రాంతం కావడంతో ఈ వ్యవహారం బయటకు రాకుండా పోలీసులు జాగ్రత్తలు తీసుకున్నారన్న విమర్శలు వ్యక్తమవుతున్నాయి. ఘటన బయటకు రావడంతో గురువారం పోలీసులు మీడియాకు వివరాలు వెల్లడించారు. పోలీసుల కథనం ప్రకారం… అనకాపల్లి జిల్లాకు చెందిన మైనర్ బాలికను తల్లిదండ్రులు విశాఖపట్నంలోని ఓ ప్రైవేట్ కళాశాలలో ఇంటర్ చదివేందుకు చేర్పించారు. హాస్టల్‌లో ఉంటున్న ఆ బాలికకు తన స్నేహితురాలి ద్వారా చినగదిలికి చెందిన దల్లి సాయిచంద్ అనే యువకుడు పరిచయమయ్యాడు. ఆమెను ప్రేమించాలని ఒత్తిడి చేస్తూ నిందితుడు తరచూ వేధింపులకు గురి చేశాడు. తన ప్రేమను అంగీకరించకపోతే ఆత్మహత్య చేసుకుంటానని బెదిరించినట్లు పోలీసులు తెలిపారు. గత ఏడాది ఏప్రిల్‌లో బాలికను పాయకరావుపేట సమీపంలోని ఓ లాడ్జికి తీసుకెళ్లి అసభ్య వీడియోలు చిత్రీకరించాడు. అనంతరం ఆ వీడియోలను సోషల్ మీడియాలో పెడతానని బెదిరిస్తూ బ్లాక్‌మెయిల్ చేసి విశాఖలోని పెందుర్తి ప్రాంతంలో తన ఇంటికి తీసుకెళ్లి పలుమార్లు లైంగిక దాడికి పాల్పడినట్లు ఆరోపణలు ఉన్నాయి. ఈ ఏడాది జనవరి చివరి వారంలో కూడా బాలికను తన ఇంటికి తీసుకెళ్లి, జరిగిన విషయాన్ని పోలీసులకు చెబితే వీడియోలను సోషల్ మీడియాలో పెడతానని ఆమె తల్లిదండ్రులను ఫోన్‌లో బెదిరించినట్లు సమాచారం. బాలిక మైనర్ అని తెలిసినా నిందితుడి తల్లి కూడా ఆమెను నెల రోజుల పాటు ఇంట్లోనే నిర్బంధించినట్లు పోలీసులు వెల్లడించారు. వేధింపులు తట్టుకోలేక ఈ నెల 8న బాలిక నిందితుడి ఇంటి నుంచి తప్పించుకుని తన తల్లిదండ్రుల వద్దకు చేరుకుని జరిగిన విషయాన్ని తెలిపింది. దీంతో వారు పాయకరావుపేట పోలీసులను ఆశ్రయించారు. దర్యాప్తులో నిందితుడు తీసిన వీడియోలను బాధితురాలి తల్లిదండ్రులకు పంపడంతో పాటు ఇన్స్టాగ్రామ్ ద్వారా వారి బంధువులకు కూడా పంపినట్లు పోలీసులు గుర్తించారు. మరో ఇద్దరు అమ్మాయిలతో కూడా ఇదే విధంగా వీడియోలు తీసినట్లు విచారణలో బయటపడింది. బాధితురాలి ఫిర్యాదు ఆధారంగా పోలీసులు కేసు నమోదు చేసి నిందితుడు దల్లి సాయిచంద్‌తో పాటు అతడి తల్లిని అరెస్టు చేశారు. కేసు పై పోలీసులు దర్యాప్తు కొనసాగిస్తున్నారు.
Admin
DNB News
మరిన్ని వార్తలు
Developed By :
