డిజిటల్ అరెస్ట్ పేరుతో మోసం – రిటైర్డ్ ఎక్సైజ్ ఇన్స్పెక్టర్ నుంచి రూ.98,888 దోపిడి
DNB News - తెలంగాణ / : రంగారెడ్డి జిల్లా ఎల్బీనగర్ పరిధిలో డిజిటల్ అరెస్ట్ పేరుతో మరో సైబర్ మోసం వెలుగులోకి వచ్చింది. హిమాపురి కాలనీ, కేబీఆర్ కన్వెన్షన్ సమీపం, మంసూరాబాద్ నివాసి కంచర్ల సత్యనారాయణ రెడ్డి (66), రిటైర్డ్ ఎక్సైజ్ ఇన్స్పెక్టర్ను లక్ష్యంగా చేసుకుని సైబర్ నేరగాళ్లు రూ.98,888లు కాజేశారు. ఫిర్యాదు ప్రకారం, 28-02-2025న ఆయనకు తెలియని మహిళ నుంచి ఫోన్ కాల్ వచ్చింది. ఆమె తనను “మెఘనా రెడ్డి” అనే సర్కిల్ ఇన్స్పెక్టర్గా పరిచయం చేసుకుని, ఆయన పేరుతో నమోదైన మొబైల్ నంబర్ ద్వారా ఉగ్రవాదులకు గోప్య సమాచారం పంపుతున్నారని తప్పుడు ఆరోపణలు చేసింది. ఈ కేసులో ఆయనపై దర్యాప్తు కొనసాగుతోందని చెప్పి, మరో వ్యక్తికి కాల్ను కలిపింది. ఆ వ్యక్తి తనను ఉన్నతాధికారిగా పరిచయం చేసుకుని, వ్యక్తిగత వివరాలు, బ్యాంకు ఖాతా సమాచారం బలవంతంగా తీసుకున్నాడు. భయపెట్టేందుకు Enforcement Directorate పేరిట నకిలీ కేసు రిపోర్ట్, అలాగే National Investigation Agency పేరిట గోప్యతా ఒప్పందం వంటి కృత్రిమ పత్రాలను పంపించారు. తక్షణ అరెస్టు చేస్తామని బెదిరిస్తూ “దర్యాప్తు ప్రక్రియ”లో భాగంగా డబ్బులు బదిలీ చేయాలని ఒత్తిడి తెచ్చారు. దీంతో భయాందోళనకు గురైన సత్యనారాయణ రెడ్డి ఫోన్పే ద్వారా మొత్తం రూ.98,888లు బదిలీ చేశారు. అనంతరం ఇది పోలీసు, సీబీఐ లేదా ఈడీ అధికారుల పేరుతో మోసం చేసే “డిజిటల్ అరెస్ట్” స్కామ్ అని గ్రహించారు. ఈ ఘటనపై కేసు నమోదు చేసిన పోలీసులు క్రైమ్ నెం. 285/2026గా నమోదు చేసి, భారతీయ న్యాయ సంహిత (BNS) సెక్షన్ 318(4), 319(2)తో పాటు ఐటీ చట్టం సెక్షన్ 66(C), 66(D) కింద దర్యాప్తు కొనసాగిస్తున్నారు. పోలీసులు ప్రజలకు సూచిస్తూ, అధికారుల పేరుతో ఫోన్ చేసి డబ్బులు అడిగితే వెంటనే నమ్మకూడదని, అనుమానం ఉంటే సమీప పోలీస్ స్టేషన్ లేదా సైబర్ క్రైమ్ విభాగాన్ని సంప్రదించాలని తెలిపారు.
Admin
DNB News
మరిన్ని వార్తలు
Developed By :
