దోశా తినిపిస్తానని చెప్పి తీసుకెళ్లి ముగ్గురు చిన్నారుల ప్రాణాలు తీసిన ఘటన తీవ్ర విషాదాన్ని మిగిల్చింది
DNB News - తెలంగాణ / : దోశా తినిపిస్తానని చెప్పి తీసుకెళ్లి ముగ్గురు చిన్నారుల ప్రాణాలు తీసిన ఘటన తీవ్ర విషాదాన్ని మిగిల్చింది. తల్లిదండ్రులు చేసే తప్పులకు అమాయక పిల్లలు బలవుతున్న దారుణ ఘటనగా ఇది మారింది. కంటికి రెప్పలా కాపాడాల్సిన కన్నవాళ్లే, అభం శుభం తెలియని వయసులో ఉన్న చిన్నారుల ప్రాణాలను తీసేయడం సమాజాన్ని కలచివేస్తోంది. అమ్మా.. నాన్నా.. అని దీనంగా రోదిస్తూ ఊపిరాడక గిలగిలా కొట్టుకుంటూ ప్రాణాలు విడిచిన ఆ చిన్నారుల పరిస్థితి ఎంత హృదయ విదారకమో మాటల్లో చెప్పలేం. పిల్లలను ప్రేమగా పెంచి రక్షించాల్సిన తల్లిదండ్రులే ఇలా వారి జీవితాలను ముగించేయడం అనేక ప్రశ్నలను లేవనెత్తుతోంది. తమ జీవితం ఎలా ఉందో తెలిసినప్పుడే, పిల్లలను పోషించే స్థోమత లేదని ముందే తెలుసుకున్నప్పుడే ఎందుకు ఇలాంటి నిర్ణయాలు తీసుకుంటున్నారు అన్న ప్రశ్నలు తలెత్తుతున్నాయి. ఒకరి వెంట ఒకరిని కనిపెంచి, ఆ తర్వాత బాధ్యతలు మోయలేమని అమాయక చిన్నారుల ప్రాణాలు తీసే హక్కు ఎవరు ఇచ్చారు అని సమాజం ఆగ్రహం వ్యక్తం చేస్తోంది. ఈ మధ్యకాలంలో ఇలాంటి ఘటనలు వరుసగా వెలుగులోకి వస్తుండటం తల్లిదండ్రులపై కూడా భయం కలిగించే పరిస్థితిని తీసుకొస్తోంది. మానసిక ఒత్తిడి, కుటుంబ కలహాలు, అక్రమ సంబంధాలు, ఆర్థిక సమస్యలు – కారణం ఏదైనా సరే, చివరికి పిల్లల ప్రాణాలే బలి కావడం ఆందోళన కలిగిస్తోంది. ఇక్కడ చదువుకున్న వారు, సంపన్నులు, పేదవారు అనే తేడా కూడా కనిపించడం లేదు. ఉన్నత ఉద్యోగాలు, ఆస్తిపాస్తులు, అన్ని సదుపాయాలు ఉన్నవాళ్లు కూడా మానసిక సమస్యలతో ఇలాంటి దారుణాలకు పాల్పడుతున్న ఉదాహరణలు పెరుగుతున్నాయి. అమాయక చిన్నారుల ప్రాణాలను కాపాడటం ప్రతి తల్లిదండ్రి తొలి బాధ్యత అని నిపుణులు చెబుతున్నారు. కుటుంబ సమస్యలు ఎంత పెద్దవైనా, వాటి పరిష్కారం పిల్లల ప్రాణాలు తీయడం కాదని, సమస్యలు ఉంటే కౌన్సెలింగ్ తీసుకోవాలని, సమాజం సహాయం కోరాలని వారు సూచిస్తున్నారు. ఇలాంటి ఘటనలు పునరావృతం కాకుండా కుటుంబ విలువలు, మానసిక ఆరోగ్యంపై అవగాహన పెంచాల్సిన అవసరం ఉందని సామాజిక వేత్తలు అభిప్రాయపడుతున్నారు.
Admin
DNB News
మరిన్ని వార్తలు
Developed By :
